Вовед

Времето поминато во училиште и едукација игра голема улога во развојот на детето.  Како наставник, давањето поддршка на учениците со дислексија е прекрасна можност, но може да претставува и голем предизвик. Важно е да се запомни дека детето кое се соочува со дислексија води битка, која не се заснова на ниско ниво на интелигенција или мрзеливост ниту пак тоа е нивен личен избор.

Постојат многу различни стратегии за еден наставник да ја приспособи наставата за да им помогне на учениците со дислексија да напредуваат во читањето пишувањето, аритметичките операции и временската ориентација.

За да им го појасните поимот дислексија како нормална појава, објаснете им на учениците со дислексија дека она во што се разликуваат од останатите ученици е начинот на процесирање на информациите поради различно развиени мозочни хемисфери. Или едноставно објаснете им дека тие само учат на поразличен начин од останатите ученици затоа што во нивните мозочиња е многу поразвиена десната хемисфера.

Важно да се запомни!

Најголемиот дел од стратегиите и техниките дадени во овој модул, не бараат посебно прилагодување на наставата во однос на воспоставената пракса. При употребата на подолу презентираните техники и методи со сигурност ќе увидите подобрување на училишниот успех кај учениците со дислексија, но и кај сите останати ученици.